Quen mellor cun delincuente para explicar a crise

Quixera felicitar aos homes de prol da Fundación La Rosaleda, presidida polo ex-presidente da Xunta, Fernández Albor, pola súa agudeza á hora de buscar as causas da crise (saqueo). Quen mellor cun delincuente financeiro para explicar as causas do desastre?

Segundo a información de El Correo Gallego, hoxe mesmo Mario Conde 'o empresario e ex-presidente de Banesto (algo máis faría, digo eu) impartirá unha conferencia organizada pola citada Fundación que 'contará coa presenza de destacadas personalidades do ámbito económico, sanitario e social da comunidade. Presentado polo escritor Alfredo Conde (quen será este?) falará sobre as causas que levaron a actual crise que, segundo a súa análise, non é só económica senón de valores' (non é unha broma). Que brillantez a deste señor, unha crise de valores!!! e nós pensando só nos cartos!

Supoñemos que, e volvo citar El Correo, 'unha das persoas máis influentes do país nos oitenta' cunha traxectoria vital e profesional inmaculada, unha vítima do sistema: 'Despois virían varios procesos xudiciais, o cárcere e a caída en desgraza que lle levou a construír un novo eu' (sic) é o mellor exemplo que poden seguir as personalidades asistentes a súa charla para sacarnos do pozo. Si señor, así se constrúe un país. De aquí se sale, titúlase o libro que Mario Conde, co espírito empresarial do que carecemos os que non somos personalidades, aproveitará para vender na conferencia.

A esta non, pero se organizan outra co Dioni alí estarei. Seguro que é moito máis divertido e transmite máis valores.

Estamos en boas mans!!!

E aínda hai quen dubida participar na folga xeral do 29... manda carallo!